TNLA ထိန်းချုပ်ထားသည့် မြို့များကို စစ်ကော်မရှင်က ဦးတည် စစ်ဆင်နေခြင်း ဖြစ်သည်။ နောင်ချိုနှင့် ကျောက်မဲမြို့များကို ပြန်သိမ်းခဲ့ပြီးနောက် စစ်ကော်မရှင်သည် ကျောက်မဲ-မိုးကုတ်လမ်းပေါ်ရှိ မိုင်းတင်းရွာအနီးအထိ တပ်ဖြန့်ထားသည်။ ထို့အပြင် နောင်ချို-မိုးကုတ်လမ်းပေါ်ရှိ ရတနာသိင်္ဂီရွာကိုလည်း သိမ်းယူထားသည်။

စစ်ဆင်ရေးတာဝန်ယူရသော စစ်ဗိုလ်ချုပ်များအားလုံးမှာ စတုတ္ထမျိုးဆက်တပ်မတော်၏ ဗိုလ်ချုပ်များ ဖြစ်လာကြသည်။ အသက်အရွယ်နှင့် အပတ်စဉ် များစွာငယ်သော ဗိုလ်ချုပ်များက စစ်ဆင်ရေးကွပ်ကဲမှုများကို တာဝန်ယူကြမည်ဖြစ်သဖြင့် နိုင်ငံတဝန်း စစ်ဆင်ရေးများအပေါ် သက်ရောက်မှုများ ရှိနိုင်သည်။